• الرئيسية
• منوعات

أول ظهور لباسم يوسف على شاشة مصرية بعد غياب سنوات

عاد الإعلامي باسم يوسف للظهور مجددًا على الشاشات المصرية بعد غياب استمر سنوات طويلة، من خلال حلقة جديدة من برنامج "كلمة أخيرة" الذي يقدمه الإعلامي أحمد سالم على قناة ON، كاشفًا العديد من الأسرار حول حياته ومشواره الفني والإعلامي.

وأعرب باسم يوسف في بداية اللقاء عن سعادته بالعودة إلى القناة التي شهدت انطلاقته الأولى عام 2011، قائلًا: "سعيد جدًا إن أول ظهور ليا بعد السنين دي يكون على نفس القناة اللي بدأت منها".

باسم يوسف: فقدت لقب "دكتور" من زمان

خلال الحوار، مازحه الإعلامي أحمد سالم بقوله: "اتفقنا هقولك يا دكتور، وأنت تقولّي يا أستاذ، رغم إن علاقتك بالطب مش زي الأول"، ليرد باسم يوسف ضاحكًا:"أنا فقدت الحق إني يتقال لي دكتور، بقالي 15 سنة ما حطتش إيدي على عيان، وده لمصلحتهم، أنا فقدت الأهلية من زمان جدًا".

شائعات عن الأموال والعقود الضخمة

تطرق باسم يوسف إلى الشائعات التي تطارده مع كل ظهور إعلامي، موضحًا أن الحديث عن الأجور المرتفعة يسبب له مشكلات شخصية، خاصة مع زوجته.

وقال ساخرًا: "كل ما أطلع في برنامج يطلعوا يقولوا إني باخد ملايين.. ومراتي بتقعد تسألني بتودي الفلوس فين؟ متجوز عليا ولا فاتح بيت تاني؟ دي فلوس تفتح أربع بيوت!".

وأضاف: "بقولها ماخدتش 22 مليون جنيه.. أنا خدت 22 مليون دولار، وبقول لكل الجهات الإعلامية الغربية ده أجري وسعري، عندي استعداد أقدم أي حاجة.. أفلام، إعلانات، حفلات، حتى طهور!".

“أنا الراجل الغلط في المكان الغلط”

وعن ارتباط اسمه بالجدل الدائم، قال باسم يوسف إنه لا يرى نفسه يستحق كل هذا الضجيج:مش فاهم التوقعات دي جاية منين.. ساعات بحس إني في مكان مش بتاعي، مش عارف أنا محظوظ ولا لأ، بس جوايا إحساس دايم إني الراجل الغلط في المكان الغلط".

وأضاف: "أنا بحب الكوميديا، لكن لقيت نفسي في السياسة، وده شيء مبرجل.. بقيت أشوف اسمي في الأخبار السياسية أكتر من صفحات الكوميديا، زي تريزيجيه اللي تقرأ عنه أخبار في صفحة الحوادث!".

الجمهور يبحث عن التسلية

تحدث باسم يوسف عن تغير ذوق الجمهور وطبيعة المحتوى المطلوب اليوم، موضحًا أن الناس أصبحت تبحث عن التسلية أكثر من القيمة.

وقال: "الناس عاوزة تتسلى.. لو عملت حوار مع لعيب كورة أو ممثل مشهور الناس بتدفع وقتها علشان التسلية، مش علشان المعلومة".

وتابع: "الناس بتسأل: إزاي لعيب كورة ياخد الملايين وأنا أتمرمط في طب أو هندسة؟.. بس الحقيقة إن اللي بيشتغل في التسلية بياخد أكتر، لأن الجمهور بيروح له بمزاجه مش كاحتياج".

وأكد باسم يوسف: "كلنا في الآخر سلع، الناس بتروح للي بيسليها، لأن المزاج بقى أهم من الحاجة".

باسم يوسف يستعيد بداياته

واستعاد الإعلامي الساخر ذكريات بداياته مع الشباب الذين لم يعاصروا انطلاقته الأولى عام 2011، قائلًا:معظم الشباب دلوقتي مش فاهمين ليه كل الدوشة دي؟ بيقولوا مين عمو اللي طالع على التلفزيون ده؟".

وأشار إلى أنه رغم مرور السنوات، إلا أن الجمهور ما زال يتذكره، وهو ما يراه “نعمة كبيرة ومسؤولية في نفس الوقت”.